26 JUL 2012
前言:
呢篇OPENRICE既第100篇食評: 係幾年前開左個OPENRICE ACCOUNT, 寫左幾次之後就冇寫了,係幾個月前又開始返返寫, 講緊既係由廿幾篇寫到而家100篇了,心中有說不出既激動,
多謝OPENRICE提供左一個好好既平台俾食家分享佢地既心得,我亦成為左一個很靠OPENRICE搵食既人:)
由幾年前開始已經好鐘意食食食,當然食之前要影影影喇!而家穩定既有寫食評,令成個飲食經歷更完整,亦可以分享下自己飲食一啲飲食既經驗
車品品小食 Bon Bon Cafe
電話 : 2180 9655
幾年前都食過車品品,之前得悉原來佢地有賣到$36一隻既鮑魚
食飯時候見到門外有一條小小既人龍,後黎左金船長食,
即使食埋BLACK N WHITE,要挺住肚子,依然想試下呢度既鮑魚,
話晒大角咀對我黎講都唔係一個太方便既地方, 難得踏足大角咀真係要試一試
係10點幾既時候, 都係啱啱有一檯走先有位
入到去既時候係有大概5,6張四方形既檯
用既係OPEN KITCHEN既模式
呢度裝修都係以簡單實用為主
很有家既感覺
(後黎補影既相)
好得意既係見到檯面有幾舊鮑魚既裝飾 哈咕 好可愛
但唔知點解會擺左係個托盤上面...
一入去已經被十分親切有禮,和藹可親,有禮好客, 笑容滿面既老闆娘為之打動
講緊既係即使已經做出名氣, 但絲毫冇一種唔休做,"你鐘意黎就黎,唔黎就算既心態"
點菜既方式係用劃既,有好多都好想試, 好多都已經食唔落了,
即使十分飽,依然想係胃入面騰出一點空間放隻溏心皮蛋入去
點左溏心皮蛋同紅燒鮑魚
溏心皮蛋: ($12) 食既方法係用醋倒落已經放係碟邊既糖度,
老闆娘已經預先講左冇一貫用既子薑,後黎先知原來有一樽樽處理緊既子薑,係將會用一年既
建議可先試原味,再食落左糖醋既
溏心皮蛋係新鮮剝既,所以不見有放耐左會出既紋路.
食落亦唔冇苦澀味,好食過係鏞記既心皮蛋,
車品品既比鏞記既食落更流心
加左糖醋既亦別有一番風味,有點酸甜,有一粒粒既糖粒確實有令口感更豐富
小口小口既品嘗,很有滿足感
紅燒吉品鮑魚 ($70/2隻) :以興奮既心情迎接呢兩隻鮑魚,
用既係罐頭既大連吉品鮑
雖然$30幾蚊既鮑魚唔會有太大太大既期望, 但食落冇令人失望
捨不得一口食落去,選擇小唔小口既品嚐
鮑魚炆得入味,唔會有汁肉分離既感覺
鮑魚食落有嚼勁, 肉質很厚身
以$30幾蚊既水平黎講已屬上上水平
可以同四季酒店龍景軒鮑魚酥上既鮑魚媲美,龍景軒既係細隻啲既,汁濃啲,肉身再扎實一啲
埋單既時候同健談既老闆娘傾計,原來呢間店只係由3個人打理（包括老闆娘）
但佢地依照會堅持食物新鮮即整既理念,皮蛋係即剝,車仔麵既料亦係新鮮整既
但因為食客投訴上菜慢既關係,所以而家先唔俾搭檯,要食客少等一下,寧願做少啲生意
希望其他食客都可以體諒一下要食好既食物係須要小等一下
總括黎講,呢一次飲食經驗係有驚喜既,食物既質素以呢個價錢係上上之選,很滿意!
下次會再黎搵妳架,老闆娘,要食妳推薦既蠔皇醬鵝肝油撈幼!
平均消費: $41
